ده نوع من المديرين ميعرفش يعيش من غير أزمة ولو اليوم مافيهوش توتر يحس ان في حاجة ناقصة
تعرفه ازاي المدير الثورجي ؟
١- بيبدأ الاجتماعات بصوت عالي وينهيها بخناقة
٢- كل اسبوع عنده خطة انقاذ جديدة للشركة
٣- بيحب يسمع نفسه أكتر مايسمع فريقه
٤- التغيير بالنسباله هدف مش وسيله ودايما علي لسانه التغيير مطلوب
وطبعا نتيجة كده هتلاقي فريقه بيشتغل وهو على أعصابه والناس بتخاف تغلط …. فيغلطوا أكتر
ازاي بقي تتعامل مع مديرك ” الثورجي “
١- افصل بين انفعالاته وتعليماته : يعني استنى لحد ما التوتر يهدى وبعدين راجعه في التفاصيل بهدوء ..هيستجيب ويمكن يشكرك انك متسرعتش في التنفيذ
٢- ما تحاولش تناقشه وهو في مود الغليان لأن الثورجي بيحترم اللي يفضل ثابت وهو منفعل مش اللي يرد بنفس طريقته
٣- افهمه مش تصطدم بيه والقط جوهر المطلوب منه واعمل ميوت للطريقة
هتقوللي ياسلام يعني ابقي ضعيف معاه ومعنديش شخصية ولا كرامة ؟
هقولك انت بتدير موقف مش بتتنازل .. وفي بيئات عمل كتير فيها مديرين عصبيين أو غير ناضجين واختيار الهدوء بدل المواجهة ده مش ضعف ده قوة ضبط نفس واحتراف ..وبعدين الكرامة مش معناها ترد الزعيق بزعيق !! الكرامة إنك ما تنزلش لمستوى الفوضى..
انت مش ساكت عشان خايف …انت ساكت عشان فاهم