ساعات بنخلط بين موظف فهمه ضعيف و موظف كفاءته ضعيفة خاصة ان الاتنين صداع بس واحد فيهم صداع مزمن والتاني فرصة استثمارية .
تعالي نعرف ٥ مؤشرات سلوكية لكل واحد فيهم تقدر بيهم تميز بينهم بسهولة
نبدأ بالموظف “ضعيف الفهم ” اللي مجازا بتقول عليه ” غبي ” ده مشكلته في عقله واستيعابه …تعرفه ازاي ؟
١- بيكرر نفس غلطاته عشرات المرات رغم التنبيه عليه
٢- مشكلته في طريقة التفكير نفسها بيشوف الأمور بشكل محدود
٣- مبيعرفش يربط الأحداث ببعض
٤- لازم تمشي وراه في صغائر المهام
٥- مش بيستوعب الصورة الكبيرة
انما الموظف “ضعيف الكفاءة ” واللي مجازا بنقول عليه ” خايب ” مشكلته في مهاراته مش في عقله ممكن يكون ذكي جدا لكن لسه ناقصه أدوات أو تدريب …تعرفه ازاي ؟
١- مبيكررش الخطأ…بس مش حريف
٢- يفتقد للمسة الجمالية ولايهتم بالتفاصيل بتاعة المحترفين
٣- أغلب الوقت شغله مقبول مش جيد جدا ولا ممتاز
٤- هتلاقي علاقة طردية سريعة بين تدريبه أو توفير أدوات وبين انتاجيته وجودة شغله
٥- بيطلع شغل أفضل مع الوقت وتحسنه ملحوظ جدا
طيب تتعامل معاهم ازاي باختصار :
– الموظف ضعيف الفهم : اديله مهام بسيطة ومتعتمدش عليه في أي قرار وبلاش تضيع وقتك معاه وحاول تقلل أثره علي الفريق
– الموظف ضعيف الكفاءة : حطله أهداف واضحة وبخطة تدريب قصيرة ينجزها ندخل علي اللي بعدها وادعمه بفيدباك مستمر