تسمع عن الدراما كوين ..الشكاية البكاية اللي عايشة دور الضحية طول الوقت …ياسلام بقي لما بيكون المدير هو اللي دراما كينج
مدير تلاقيه مشغول طول الوقت إنه يكون بطل القصة المأساوية وتقدر تعرفه بسهوله من المؤشرات السلوكية دي :
١- بيحول أي مشكلة صغيرة لفيلم طويل ويجيبلك القديم والجديد
٢- أي ملاحظة سواء من الادارة العليا أو من حد من فريقه بيفهمها هجوم شخصي عليه
٣- أي انجاز بينسبه لنفسه بس هو اللي عمل كل حاجة وأي حاجة ..حلوة
٤- لو حصلت مشكلة يبقي عشان الظروف ضده والعميل متآمر عليه وشخص ما في الشركة حاطه في دماغه وعايز يفشله ويقولك انه كان حاسس بكل ده قبل مايحصل بس كان سايبه يمكن ربنا يهديه
٥- بيستهلك طاقة الفريق في التهويل بدل الحل!
تعالي أقولك بقي ازاي تتعامل معاه ؟
أولا : اربطه دايما بالأرقام والنتايج وانتهج معاه Result-Oriented Mindset
ثانيا : اختصر معاه في الاجتماعات وقلل مساحة الدراما في كلامه
ثالثا : لو انت موظف في فريقه اعتمد علي التوثيق ومتجادلش معاه بالعاطفة أو الأعذار لأنه ببساطه أقوي منك في ده ..ده كينج الدراما متنساش
وختاما ياصديقي لو لقيت نفسك في فريق مدير دراما كينج اعتبر ده تدريب ليك ازاي تحافظ على احترافك وسط الفوضي ولو قدرت تنجح معاه فمبروك انت عندك مهارة الذكاء العاطفي