دي تاني حالة في نفس اليوم لعميل صاحب عمل بيدي أكتر من اللازم ..بيدي فرص وبيدي مساحة للنقاش الطويل وبيدي لناس أكبر من حجمها الحقيقي
وللأسف مش بيلاقي غير جحود ونكران ..والأسوأ انهم كمان بيطلعوا يشتموه هو وشركته ! وده مش بيحصل مع كل الناس بيحصل بس مع النوع اللي دايما بياخد أكتر من اللي يستحقه
اللي اتعود ياخد بدون ما يتعب بيعتبر الكرم “حق مكتسب ” مش فضل منك ! ولما يتسحب منه بيشوف ده ” ظلم ” عشان انت عودته علي كده !
طيب تعمل ايه لو انت من اللي بيدوا بزيادة ؟
١- كافئ بالاستحقاق مش بالعاطفة : وده من خلال تقييمات أداء ملموسة ومتقاسه وبتعكس أهداف البيزنس بتاعك
٢- اعدل : العدالة نفسها نوع من الكرم المتزن
٣- افصل بين الكرم الشخصي والكرم الإداري
ممكن تبقى طيب كإنسان لكن لازم تكون منضبط كصاحب عمل
٤- خلي كل عطاء مربوط بمعيار واضح .. عايز ترقيه؟ اربطه بهدف محقق
وافتكر يا صديقي ان في الإدارة ..العطاء بلا مقابل نوع من الفوضى المقنعة باسم الإنسانية